Europako Kontseiluak NextGenerationEU programa sortzea onartu zuen 2020ko ekainaren 21ean. Programa hori Europako Batasunak inoiz finantzatu duen estimulu ekonomikorako tresnarik handiena da, koronabirusak eragindako krisialdi izugarriari erantzuteko.
NextGenerationEU-ren helburua da gure historiako krisi sozial eta ekonomiko okerrenetakoari modu bateratuan eta koordinatuan erantzutea eta pandemiak eragindako kalteak konpontzen laguntzea. Funts horiekin, COVID-19aren ondoren Europak ekologikoagoa izan behar du, digitalagoa eta etorkizuneko aldaketa eta erronkekiko erresilienteagoa:
NextGenerationEU ekimenaren esparruan, bi finantza-baliabide berri sortu dira:
Berreskuratze eta erresilientzia mekanismoa
Kohesiorako eta Europako lurraldeetarako Berreskurapenerako Laguntza (REACT-EB)
Berreskuratze eta Erresilientzia Mekanismoa Europako Batzordearen kudeaketa zuzeneko funts berri bat da. Bere baliabideak diru-laguntzak eta maileguak dira, eta horiek programatzeko, estatu kide bakoitzak bere Berreskuratze Plana egin behar du.
2021eko apirilaren 30ean, Espainiako Gobernuak Berreskuratze, Eraldatze eta Erresilientzia Plana aurkeztu zuen. Horren arabera, 69.500 milioi euro jasoko lituzke diru-laguntzetan, eta ekainaren 16an Europako Batzordeak baiezkoa eman zuen.
Espainiako Plana hamar palanka-politikatan egituratuta dago (horien artean, seigarren palanka-politika: “Zientziaren eta berrikuntzaren aldeko ituna eta Osasun Sistema Nazionalaren indartzea”), 30 osagaitan zehazten direnak. Zientzia, Berrikuntza eta Unibertsitate Ministerioa 17. osagaiaz arduratuko da (“Zientzia, teknologia eta berrikuntzako sistema nazionalaren gaitasunen erreforma instituzionala eta sendotzea”), Berreskuratze eta Erresilientzia Mekanismotik datorren 3.400 milioi euro baino gehiagoko zuzkidurarekin.
