Zientzia, Teknologia eta Berrikuntzari buruzko ekainaren 1eko 14/2011 Legearen bidez sortu zen Ikerketaren Etikako Espainiako Batzordea, eta Zientzia, Teknologia eta Berrikuntza Politikako Kontseiluari atxikita dago. Organo kolegiatu eta independentea da, eta ikerketa zientifiko eta teknikoko etika profesionalarekin lotutako gaiei buruzko aholku-emailea.
Batzordearen eginkizun nagusien artean, honako hauek nabarmentzen dira:
- Ikerketa zientifiko eta teknikoan etika profesionalarekin zerikusia duten gaiei buruzko txostenak, proposamenak eta gomendioak egitea.
- Ikerketa zientifiko eta teknikoko jardunbide egokien kodeak egiteko printzipio orokorrak ezartzea, jarduera publiko eta pribatuen arteko interes-gatazken ebazpena ere jasoko dutenak. Kode horiek Ikerkuntzaren Etika Batzordeek eta Espainiako Bioetika Batzordeak garatuko dituzte.
- Ikerketaren etikarekin zerikusia duten nazioz gaindiko eta nazioarteko foro eta erakundeetan Espainia ordezkatzea, bioetikaren arloan izan ezik; kasu horretan, Espainiaren ordezkaritza Espainiako Bioetika Batzordeak izango du.
- Espainiako zientzia-, teknologia- eta berrikuntza-sistemako eragile betearazleekin lotutako etika-batzordeak sor daitezen bultzatzea.
