Inbertsio hori automozio jasangarriaren arloan egiten da, eta, horretarako, laguntza ematen zaie automobilgintzan aplikatzeko teknologietako enpresen I+G+B proiektuei, sektorearen gaitasun teknologikoa alor guztietan handitzeko. Batez ere, emisio oso txikiko eta birziklagarritasun handiko energia-metaketako sistemak garatuko dira; eraginkortasun handiko mugikortasun-sistemak hidrogenotik abiatuta, gidatze autonomoa eta mugikortasun konektatua, edo ekoizpen-inguruneak sistema seguru eta sendoekin egokitzea, industria-ingurune adimendunean pertsonen eta makinen arteko interakziorako.
Inbertsio horren helburua da, hala badagokio, partzialki itzulgarriak diren dirulaguntzen eta laguntzen bidez, enpresa-izaerako I+G+B proiektuak finantzatzea, automozio jasangarriaren eremuan aplika daitezkeen teknologiak garatzeko; zehazki, honako hauek:
- Ibilgailu elektriko, hibrido eta hidrogeno bidezkoetarako osagaiak eta plataformak garatzea, energia-eraginkortasun handiena bilatuz, material, osagai eta azpisistemak optimizatuz, bai birziklatzeko errazak direlako, bai material birziklatuak erabiltzen direlako.
- Gidatze autonomoa eta mugikortasun konektatua —ibilgailuen hardware- eta software-arkitektura berriak garatzea, gidatze autonomorako errendimendu handiko prozesuek eusten dituztenak; prozesua ontzian modu zentralizatuan kudeatzea; jatorri heterogeneoko seinaleak kudeatzea, eta ibilgailuak kanpoaldearekin duen erlaziorako sentsore- eta eragingailu-sistema—.
- Ekoizpen-inguruneak sistema seguru eta sendoekin egokitzea, pertsonen eta makinen arteko interakziorako, industria-ingurune adimendunean, ibilgailu elektriko, hibrido eta hidrogenoz higiarazitako sistemetarako osagaiak eta sistemak fabrikatzeko.
Proiektuak 3-8 enpresa parte-hartzaileko enpresa-partzuergoek egin beharko dituzte, betiere gutxienez ETE baten parte-hartzearekin. Proiektu bakoitzeko gutxieneko aurrekontua 5 milioi eurokoa izango da, eta hiru urteko iraupena izango du. Ikerketa-erakundeek azpikontratazio-erregimenean parte hartu ahal izango dute.
