CISAko Segurtasun Biologiko Handiko Laborategia 1993an sortu zen. Zentro hori Valdeolmosen (Madril) dago, eta CSICen mendeko Nekazaritzako eta Elikagaigintzako Ikerketa eta Teknologiako Institutu Nazionalaren (INIA) mende dago. Instalazio horrek 3. euste-maila biologikoa du (NCB-3, Osasunaren Mundu Erakundearen arabera, eta 4, Animalien Osasunaren Mundu Erakundearen arabera), eta 40 laborategi eta areto komun ditu. Halaber, animaliategiko 19 gela ere baditu, hainbat espezieri ostatu emateko diseinatuak, hasi arrainetatik eta zaldietaraino. Animaliekin esperimentatzeko eta gaixotasun oso kutsakorrak eta inpaktu handikoak ikertzeko aukera ematen du, bai animalien osasunean bai osasun publikoan (zoonosia).
Gizakiari eragin diezaioketen arrisku handiko birus exotikoekin (NCB-3+, Espainiako altuena) ikerketa- eta garapen-lanak egiteko prestatuta daude CISAren laborategietako bi. Guztira, instalazio horiek 10.824 m2-ko azalera hartzen dute.
CISAren helburua da Espainiako abere-aziendaren eta basa-faunaren gaixotasun infekzioso eta exotikoak aztertzea, prebenitzea eta kontrolatzea, eta oso aktiboki parte hartzen du diagnostiko- eta kontrol-sistemen garapen teknologikoan. Horretarako, animalien osasunari buruzko ikerketa maila zientifiko gorenean garatu eta bultzatzen du, eta Nekazaritza, Elikadura eta Ingurumen Ministerioaren mendeko erreferentziako laborategi nazionalei laguntzeko laborategi gisa parte hartzen du.
