Zer da PERTE Aeroespaziala?

PERTE Aeroespaziala ikerketa eta berrikuntzako proiektu estrategiko bat da, sektoreak bizi dituen erronka eta aukera berrien aurrean Espainiako industria aeroespaziala trebatuko duena, eta munduko abangoardian kokatuko duena. Espainiako Gobernuaren nazioarteko lehen PERTEa da, Espainiako eta Portugalgo berreskuratze-funtsak konbinatzen dituena eta Europako Espazio Agentziaren (ESA) bidezko lankidetza-proiektuak barnean hartzen dituena. Espazioaren inguruko eraldaketa-proiektu bat da, estatu mailakoa. Sektore hau oinarrizko sektoreetako bat da, eta askorentzat guztiz ezezaguna da, nahiz eta herritarren egunerokoa horren menpe dagoen eta ekonomia hazteko potentzial handia duen.

PERTE Aeroespazialaren helburu orokorra da Espainiako sektore aeroespaziala funtsezko eragile gisa kokatzea, sektorean aurreikusitako eraldaketa handiei lotutako erronka eta aukera berrien aurrean.

Helburu hori lortzeko, helburu orokorra lortzen laguntzen duten helburu partzialak ezarri dira.

PERTE Aeroespaziala hiru ataletan egituratzen da: Aeronautikoa, Espaziala eta Zeharkakoa.

Atal aeronautikoak 5 jarduketa ditu, espazialak 6 eta zeharkakoak 7; guztira, 18 jarduketa. Eranskinean sartutako jarduera gehigarriak negoziatzen ari dira gaur egun.

Proiektu estrategiko honek laguntza publikoetarako aurrekontu bat du esleitua, bost urtetan (2021-2025) gauzatuko dena eta 2.193,09 milioi eurokoa. Bertan jasota dauden eta finantzaketa espezifikoa duten jarduketen laguntzen izaera kontuan hartuta, horietako bakoitzak sektore pribatu aeroespazialeko zuzeneko inbertsioak erakartzeko gaitasuna izango duela kalkulatzen da; guztira, 279,30 M €.

I+G+B aeroespazialerako laguntza publiko eta inbertsio pribatu zuzen horiek batuta, 2472,39 milioi euroko zuzeneko inbertsioa lortzen da.

Gainera, I+G+B aeroespazialean egindako zuzeneko inbertsio horrek zeharkako inbertsio bat ere sortzen du, batez ere sektore pribatuan, KPMGk zenbatetsitako inbertsio osoaren (1834) biderkatzailea jasotzen duena. Horrenbestez, PERTE horrek zuzenean edo zeharka sortutako I+G+Bko inbertsioa 4533,66 milioi eurokoa da guztira.

Sektore aeroespazialeko garapenek hainbat aplikazio-eremu dituzte.

PERTE Aeroespaziala osatzen duten inbertsio eta jarduera guztiak era askotako inpaktu nabarmen positiboak sortzeko diseinatuta daude. Horien guztien artean, nabarmentzekoa da Espainiako industria aeroespaziala indartu eta gaitzea. Horrek lagundu egingo dio bere lehiakortasuna areagotzen eta jarduten duen ingurune globalean duen posizionamendua hobetzen.

Oxford Economics-en arabera, I+G+B programa aeronautikoek sortutako itzulkin sozialaren tasa urteko % 70ekoa da BPGan. Horrek esan nahi du aeronautikako I+G+Bn inbertitutako 100 euro bakoitzeko 700 euro handitzen dela BPGa 10 urteko epean. Sektore aeronautikoa sektore aeroespazialaren % 77,4 denez, arrazoizkoa da antzeko itzulkin sozialaren tasa onartzea I+G+B aeroespazialeko jarduera osorako.

PERTE horrek eragindako I+G+B aeroespazialeko 4.534 M €-ko inbertsio osoari Oxford Economics-en aipatutako gizarte-itzulkinaren tasa aplikatuta, BPGak 10 urteko epean 31.735,6 M € handituko dela zenbatesten da. 10 urte horietan BPGk urteko % 2ko hazkundea izango duela kontuan hartuta, PERTE aeroespazialaren BPGaren eragina % 0,22koa izango dela zenbatesten da.

PERTEaren 4.534 M €-ko inbertsio osoak zuzeneko enpleguan duen eragina zenbatetsi da, TEDEA fakturazio zuzena/lanpostu zuzenak ratioa kontuan hartuta, eta kualifikazio handiko 1899 lanpostu sortuko dira (I+G+B jarduerak eta haiekin lotutakoak).

Kopuru horri, epe luzean, beste enplegu-kopuru bat gehitu ahal izango zaio; hain zuzen, PERTEk eragindako 31.735,6 M €-ko BPGaren gehikuntza zenbatetsiaren ondorioz sortzen dena. KPMGren txostenean aipatzen den 2020ko inpaktu ekonomikoaren TEDAE fakturazioa/lanpostu osoak ratioa 10 urtez bikoiztuko balitz, 14.079 lanpostuko inpaktua erangingo luke. Horietatik 4.607 zuzenekoak izango lirateke eta 9.471 zeharkakoak.