O Ministerio de Ciencia, Innovación e Universidades concede as acreditacións como Centro de Excelencia Severo Ochoa ou Unidade de Excelencia María de Maeztu co obxectivo de impulsar a calidade da investigación científica española mediante o recoñecemento dos mellores centros e unidades que destacan pola relevancia e impacto, a nivel internacional, dos resultados de investigación obtidos durante o período anterior de referencia. Esta actuación forma parte do subprograma de fortalecemento institucional do Plan Estatal de Investigación Científica e Técnica e de Innovación 2017-2020.
Considéranse dous tipos de actuación en función da personalidade xurídica, o grao de autonomía na xestión administrativa e económica e o número de investigadores. Os centros de investigación seleccionados quedarán acreditados como Centros de Excelencia Severo Ochoa e as unidades de investigación seleccionadas recibirán a acreditación Unidades de Excelencia María de Maeztu.
O recoñecemento realízase mediante unha convocatoria anual de concorrencia competitiva, sometendo as solicitudes presentadas a un proceso de avaliación e selección levado a cabo, de forma independente, por un comité científico internacional integrado por investigadores de recoñecido prestixio e impacto. Por tanto, os centros ou unidades consolidados que presenten a súa candidatura a este programa deben:
- ter un alto nivel de impacto e competitividade no seu campo de actividade no escenario científico mundial,
- someter as súas actividades de investigación de forma periódica a procesos de avaliación científica mediante comités científicos externos e independentes,
- desenvolver as súas actividades de investigación conforme a un programa estratéxico que responda á xeración de oñecemento de fronteira,
- dispoñer de actividades de formación, selección e atracción de recursos humanos a nivel internacional,
- manter acordos activos de colaboración e intercambio a nivel institucional con centros de investigación de alto nivel,
- traballar na potenciación das actividades de transferencia e divulgación do coñecemento á sociedade.
A acreditación como Centro de Excelencia Severo Ochoa ou Unidade de Excelencia María de Maeztu terá unha validez de catro anos e proporcionará: reputación e recoñecemento social e científico; un millón de euros anuais para cada un dos centros nese período ou cincocentos mil euros anuais no caso das unidades; o acceso prioritario a outras iniciativas en materia de fomento da investigación.
A actuación está dirixida a centros e unidades de investigación do sector público, así como de institucións privadas de investigación sen ánimo de lucro, cuxo liderado científico estea contrastado a nivel internacional, con capacidades para contribuír decisivamente a avanzar na fronteira do coñecemento e xerar resultados de alto impacto, así como para a atracción de talento.
As convocatorias son xestionadas pola Axencia Estatal de Investigación.
