Gobernación

A pluralidade de actores públicos e privados implicados neste PERTE vai requirir unha interrelación especialmente estreita entre todos eles. De aí a necesidade do establecemento dunha gobernación singular capaz de garantir unha efectiva colaboración entre o sector público e privado, mediante a posta en marcha dun modelo de colaboración aberta baseado en dous órganos complementarios:

Gobernación Interministerial

Créase un grupo de traballo interministerial, presidido pola Ministra de Ciencia e Innovación, no que participarán representantes daqueles Ministerios implicados na consecución deste PERTE, co fin de garantir a necesaria colaboración e coordinación entre todos eles e canalizar propostas de mellora, recomendacións e observacións relativas a aquelas iniciativas que poden apoiar a xestión eficiente do PERTE, sen menoscabo das competencias de xestión e aprobación que en cada caso ostente a unidade responsable de cada actuación.

Alianza polo PERTE Aeroespacial

Esta Alianza créase como un foro de discusión que facilitará o diálogo, a participación e o intercambio de ideas entre o sector público e privado.

Estará presidida polo titular do Ministerio de Ciencia e Innovación, e integrará aos membros do órgano interministerial descrito, ás Comunidades Autónomas, Organismos Públicos de Investigación (CSIC, IAC), así como aos representantes do sector máis destacados: Asociación Española de Tecnoloxías de Defensa, Aeronáutica e Espazo (TEDAE), Plataforma Tecnolóxica Aeroespacial Española (PAE) e demais asociacións empresariais e organizacións sindicais con relevancia no sector.

A natureza global e transnacional do sector aeroespacial, reflectida de forma explícita na configuración de diversas actuacións deste PERTE, require que os principais axentes internacionais con competencias no sector sexan incluídos no modelo de Gobernación do presente proxecto estratéxico. Para ese efecto, por proposta da presidencia, o órgano colexiado interministerial poderá incluír entre os seus representantes ordinarios, sempre que se estime oportuno, a un representante da Axencia Espacial Europea con rango executivo e capacitado para a toma de decisións, un representante do Goberno da República Portuguesa, con rango homologable ao de Director Xeral no Goberno de España, así como ao conselleiro coordinador da Representación Permanente de España ante a UE competente respecto dos Consellos de Competitividade de Espazo ou outras materias cuxa presenza se considere pertinente.