A Plataforma de Enerxía Mariña de Biscaia (BiMEP) é unha infraestrutura en condicións reais de mar para a investigación, demostración e explotación de dispositivos de captación de enerxía mariña. Fundouse en xullo de 2015 e está xestionada pola empresa pública BIMEP S.A., participada por Ente Vasco da Enerxía (EVE) e o Instituto para a Diversificación e Aforro da Enerxía (IDAE).
O obxectivo desta infraestrutura é permitir aos desenvolvedores de tecnoloxía no campo das enerxías renovables mariñas instalar e probar os seus equipos, sistemas e subsistemas.
Características principais
Ten capacidade para o ensaio e a demostración de dispositivos de aproveitamento da enerxía das ondas, de aeroxeradores mariños, prototipos de plataformas de cimentación flotante de aeroxeradores mariños, prototipos de cimentación fixa para augas profundas de aeroxeradores mariños, así como para o ensaio do equipamento auxiliar e subsistemas.
Conta cunha área restrinxida de navegación de 5,3 Km2 en mar aberto con balizamento perimetral proporcionado por sete aboias de sinalización náutica. Os dispositivos localizados na zona de ensaio únense con terra mediante catro cables eléctricos submarinos cunha capacidade de evacuación total de 20MW equipados adicionalmente con fibra óptica. A instalación dispón dunha subestación transformadora e infraestrutura eléctrica con conexión á rede. Así mesmo, conta cun sistema de apoio á navegación 24 horas, unha boia oceanográfica con medición de datos desde 2008 e oficinas para a xestión técnica.
