As grandes infraestruturas de investigación internacionais son ferramentas fundamentais para a produción de ciencia de fronteira, o impulso de desenvolvementos tecnolóxicos, o fomento da innovación e a formación de científicos e tecnólogos.
España participa activamente na construción e operación de grandes infraestruturas de investigación europeas, ben ao abeiro dun organismo internacional ou do Foro Estratéxico Europeo de Infraestruturas de Investigación (ESFRI), o que supón a realización de investimentos estratéxicos que contribúen á implementación das prioridades nacionais e europeas en investigación e innovación e que teñen por obxecto abordar os apremiantes e complexos desafíos da sociedade.
É especialmente relevante utilizar o potencial das infraestruturas de investigación como principais promotores da ciencia aberta, proporcionando datos FAIR (datos que cumpren cos principios de facilidade de localización, accesibilidade, interoperabilidade e reutilización) e de calidade, que contribúan á construción da Nube Europea de Ciencia Aberta (EOSC) e reforcen as súas capacidades ao servizo dos seus usuarios.
