Como solicitar o título polo Real Decreto 450/2005?
O título de enfermeiro/a especialista, regulado polo Real Decreto 450/2005 (boe.es), do 22 de abril, sobre especialidades de enfermaría, ten carácter oficial e validez en todo o territorio nacional e será necesario para utilizar, de modo expreso, a denominación de Especialista, para exercer a profesión con tal carácter e para ocupar postos de traballo con tal denominación en centros e establecementos públicos e privados.
As especialidades de enfermaría incluídas no Real Decreto 450/2005 son as seguintes:
- Enfermaría Obstétrico-Xinecolóxica.
- Enfermaría Xeriátrica.
- Enfermaría Pediátrica.
- Enfermaría Familiar e Comunitaria.
- Enfermaría de Saúde Mental.
- Enfermaría do Traballo.
- Enfermaría en Coidados Médico-Cirúrxicos.
A partir do 1 de xaneiro de 2022, os títulos de Especialistas en Ciencias da Saúde expídense no Ministerio de Sanidade (sanidade.gob.es).
En que consiste o procedemento pola vía excepcional?
Trátase dun procedemento dirixido aos Axudantes Técnicos Sanitarios/ Diplomados/ Graduados en Enfermaría que desexan acceder a algunha das especialidades aprobadas no Real Decreto 450/2005 (boe.es), do 22 de abril, sobre especialidades de Enfermaría e que, ademais de superar unha proba obxectiva, previamente acrediten un exercicio profesional no campo específico da especialidade solicitada nalgunha das situacións descritas na Disposición transitoria segunda do citado real decreto.
Actualmente, só se pode solicitar a especialidade de Enfermaría de Coidados Médico-Cirúrxicos pola vía excepcional, xa que o prazo de presentación de solicitudes do resto das especialidades está finalizado. Só permanece aberta a especialidade de coidados médico-cirúrxicos, xa que aínda non está aprobado o programa formativo.
