Plataforma de Secuenciación (CNAG-CRG)
O Centro Nacional de Análise Xenómica (CNAG) creouse en 2009 pola Administración Xeral do Estado e a Generalitat de Catalunya, sitúase no Parque Científico de Barcelona.
A súa misión é levar a cabo proxectos de análise xenómica a gran escala co obxectivo de contribuír á mellora da saúde e a calidade de vida das persoas. O CNAG centra as súas actividades en catro áreas de investigación interconectadas: a identificación de xenes responsables de enfermidades, a xenómica do cancro, a xenómica de enfermidades infecciosas e a xenómica de organismos modelo, en colaboración con investigadores de universidades, hospitais, organismos de investigación e empresas do sector biotecnológico e farmacéutico.
A plataforma de Xenómica do CNAG conta cun parque de doce secuenciadores de ADN de segunda xeración (nove HiSeq2000, dous HiSeq2500 e un MiSeq) capaces de secuenciar máis de 800 Gigabases ao día, o que equivale a oito xenomas humanos completos cada 24 h. Dispón tamén dunha potente instalación informática, con 2,7 petabytes para o almacenamento de datos, máis de 1.200 nodos de computación cunha capacidade de 13 TFlops, unha rede interna de 10 GBytes/s e múltiples conexións directas de 10 GBytes/s ao Centro Nacional de Supercomputación (BSC-CNS).
Plataforma de Proteómica (CRG)
A Plataforma de Proteómica do Centro de Regulación Xenómica (CRG) atópase no Parc de Recerca Biomédica de Barcelona e está participada pola Universidade Pompeu Fabra. Dispón dos espectrómetros de masas máis avanzados e ofrece servizos completos de proteómica mediante técnicas cuantitativas baseadas en espectrometría de masas que se complementan cos servizos de xenómica ofrecidos pola Plataforma de Secuenciación.
